🔴 ਵੱਡੀ ਖ਼ਬਰ# ਪੁਸ਼ਪਕ ਐਕਸਪ੍ਰੈਸ 'ਚ ਅੱਗ ਲੱਗਣ ਦੀ ਝੂਠੀ ਖ਼ਬਰ ਸੁਣ ਕੇ ਲੋਕਾਂ ਨੇ ਟ੍ਰੇਨ 'ਚੋਂ ਮਾਰੀ ਛਾਲ; ਦੂਜੇ ਟਰੈਕ 'ਤੇ ਆ ਰਹੀ ਰੇਲਗੱਡੀ...

ਮਹਾਰਾਸ਼ਟਰ- ਮਹਾਰਾਸ਼ਟਰ ਦੇ ਜਲਗਾਓਂ ਵਿੱਚ ਬੁੱਧਵਾਰ ਨੂੰ ਇੱਕ ਵੱਡਾ ਰੇਲ ਹਾਦਸਾ ਵਾਪਰਿਆ। ਇੱਥੇ ਪੁਸ਼ਪਕ ਐਕਸਪ੍ਰੈਸ 'ਚ ਅੱਗ ਲੱਗਣ ਦੀ ਅਫਵਾਹ ਪਧਾੜੇ  ਰੇਲਵੇ ਸਟੇਸ਼ਨ 'ਤੇ ਫੈਲ ਗਈ। ਇਸ ਤੋਂ ਬਾਅਦ ਕਿਸੇ ਨੇ ਚੇਨ ਖਿੱਚ ਲਈ ਅਤੇ ਕਈ ਯਾਤਰੀਆਂ ਨੇ ਚੱਲਦੀ ਟਰੇਨ ਤੋਂ ਪਟੜੀ 'ਤੇ ਛਾਲ ਮਾਰ ਦਿੱਤੀ। ਸੂਤਰਾਂ ਮੁਤਾਬਕ ਯਾਤਰੀ ਅਜੇ ਟ੍ਰੈਕ 'ਤੇ ਬੈਠੇ ਹੀ ਸਨ ਕਿ ਦੂਜੇ ਟ੍ਰੈਕ ਤੋਂ ਆ ਰਹੀ ਕਰਨਾਟਕ ਐਕਸਪ੍ਰੈੱਸ ਨੇ ਕਈ ਯਾਤਰੀਆਂ ਨੂੰ ਕੁਚਲ ਦਿੱਤਾ।  ਇਸ ਦੌਰਾਨ ਨਿਊਜ਼ ਏਜੰਸੀ ਆਈਏਐਨਐਸ ਨੇ ਦੱਸਿਆ ਕਿ ਹਾਦਸੇ ਵਿੱਚ 8-10 ਲੋਕਾਂ ਦੀ ਮੌਤ ਹੋ ਗਈ ਹੈ। ਹਾਦਸੇ 'ਚ 8 ਲੋਕਾਂ ਦੇ ਗੰਭੀਰ ਜ਼ਖਮੀ ਹੋਣ ਦੀ ਖਬਰ ਹੈ।

ਪ੍ਰਾਪਤ ਜਾਣਕਾਰੀ ਅਨੁਸਾਰ ਜਦੋਂ ਪੁਸ਼ਪਕ ਐਕਸਪ੍ਰੈਸ ਲਖਨਊ ਤੋਂ ਮੁੰਬਈ ਜਾ ਰਹੀ ਸੀ ਤਾਂ ਉਸ ਦੇ ਪਹੀਆਂ ਤੋਂ ਧੂੰਆਂ ਨਿਕਲਿਆ। ਜਦਕਿ ਕਰਨਾਟਕ ਐਕਸਪ੍ਰੈਸ ਮੁੰਬਈ ਤੋਂ ਦਿੱਲੀ ਜਾ ਰਹੀ ਸੀ। ਖਬਰਾਂ ਮੁਤਾਬਕ ਪੁਸ਼ਪਕ ਐਕਸਪ੍ਰੈਸ ਦੇ ਪਹੀਏ ਤੋਂ ਜਦੋਂ ਬ੍ਰੇਕ ਲਗਾਈ ਗਈ ਤਾਂ ਧੂੰਆਂ ਨਿਕਲਿਆ। ਇਸ ਕਾਰਨ ਟਰੇਨ 'ਚ ਅੱਗ ਲੱਗਣ ਦੀ ਅਫਵਾਹ ਯਾਤਰੀਆਂ 'ਚ ਫੈਲ ਗਈ। ਇਸ ਤੋਂ ਬਾਅਦ ਕਈ ਯਾਤਰੀਆਂ ਨੇ ਕੋਚ ਤੋਂ ਛਾਲ ਮਾਰ ਦਿੱਤੀ।ਰੇਲਵੇ ਅਧਿਕਾਰੀਆਂ ਨੇ ਵੀ ਘਟਨਾ ਦੀ ਪੁਸ਼ਟੀ ਕੀਤੀ ਹੈ। ਮੱਧ ਰੇਲਵੇ ਦੇ ਭੁਸਾਵਲ ਡਵੀਜ਼ਨ ਦੇ ਅਧਿਕਾਰਤ ਸੂਤਰਾਂ ਨੇ ਦੱਸਿਆ ਕਿ ਜਿਸ ਥਾਂ 'ਤੇ ਇਹ ਹਾਦਸਾ ਵਾਪਰਿਆ, ਉਸ ਥਾਂ 'ਤੇ ਤਿੱਖਾ ਮੋੜ ਆ ਗਿਆ, ਜਿਸ ਕਾਰਨ ਟ੍ਰੈਕ 'ਤੇ ਬੈਠੇ ਯਾਤਰੀਆਂ ਨੂੰ ਟਰੇਨ ਦੇ ਆਉਣ ਦਾ ਅਹਿਸਾਸ ਨਹੀਂ ਹੋਇਆ।